Publicado por: garza18 | 20/06/2022

Asemblea anual

Convocámoste á Asemblea Xeral Ordinaria do Colectivo Ecoloxista do Salnés para o próximo domingo 3 de xullo en Lores. Terá lugar ao aire libre na zona recreativa da ruta dos muíños e, en caso de choiva, trasladarase á casa da cultura de Lores.

Área recreativa
Casa da cultura de Lores

Terá lugar ás 11:00h en 1ª convocatoria e 11:15h en 2ª convocatoria.

En xornada de tarde realizaremos a ruta dos muíños de Lores guiada polo noso socio Rafa Vidal. Como parte do percorrido visitaremos o interior do Muíño de Entremuiños coñecendo a súa estrutura, e veremos os diferentes tipos de muíños. Quedaremos a comer na contorna así que non te esquezas de levar “comida campestre”  Anímate a vir!

Estos serán os PUNTOS DA ORDE DO DÍA:

DE QUE FALABAMOS TAL DÍA COMO HOXE O ANO PASADO?

    Lectura da acta da asemblea ordinaria de 2021.

QUE FIXEMOS AO LONGO DO 2021?

    Memoria anual de actividades 2021.

CANTOS SOMOS?

    Balance de socios 2021.

COMO ESTAMOS DE CARTOS?

    Memoria anual económica 2021.

DAREMOS O RELEVO?

     Necesitamos novas caras na directiva do CES… poderías ser ti @ nov@ vogal, presidente/a secretari@… Comunícanos a túa intención de presentarte por teléfono ou correo electrónico. A túa colaboración dentro ou fora da directiva é fundamental para o mantemento da actividade do CES e a consecución dos seus obxectivos de conservación e mellora do patrimonio natural do Salnés.

QUE CAMIÑOS SEGUIREMOS?

    Qué queremos que faga o CES? Cómo queres coidar o noso entorno dende o CES? Qué mellororas podemos levar a cabo?

ROGOS E PREGUNTAS

Publicado por: garza18 | 05/04/2022

Pasamento de Moncho Meis, o primeiro presidente do CES

Hoxe recibimos a mala nova do pasamento dun dos socios fundadores do noso Colectivo: Moncho Meis.
Fóisenos o primeiro presidente do CES, o que aos comezos dos 90 trazou o bo rumbo dos nosos primeiros pasos, nunha travesía que xa comezara xunto a Luis Rei na Asociación Ecoloxista do Grove.
 
Grazas Moncho, porque os que agora collemos o teu testemuño sempre sentimos o teu agarimo e apoio. Nós sempre estaremos orgullosos e orgullosas de ti.
Agora estamos tristes pero recordarémoste coa túa ledicia e o teu bo ánimo, como se che ve nesta foto de fai uns anos (segundo pola dereita) durante a cea aniversario dos 25 anos do CES.
 
Que a terra, que tan ben defendiches, che sexa leve.
Descansa en paz.

https://pompasfunebres.es/esquelas-y-pesames/ver-esquela/4752/

A inmensa maioría dos produtos de hixiene persoal e limpeza do fogar veñen envasados en plástico. Algúns deles mesmo están sobreenvasados como reclamo ao consumo e acabamos pagando máis polo envase que polo produto en sí. Outro problema é que adoitan ser bastante contaminantes, afectando á calidade das augas ás que finalmente son vertidos.
Por outra banda, a práctica totalidade dos utensilios de hixiene pódense substituír por outros reutilizables ou de materiais máis respectuosos co entorno.
A continuación dámosche algunhas ideas que van tanto beneficiar ao medio ambiente como á túa economía.

HIXIENE PERSOAL
– Utiliza cepillo de dentes de bambú en lugar dos de plástico. A vida media dun cepillo é aproximadamente de 3 meses, e a vantaxe dos primeiros é que son biodegradables. Así mesmo, escolle cepillos de cabelo de madeira e cerdas naturais.
– Substitúe as navallas de afeitar de usar e tirar polas de metal reutilizables. Ideais para peles sensíbeis.
– Limita o uso das toalliñas húmidas e nunca as tires polo WC, incluso cando se indica no paquete.
– Compra papel hixiénico reciclado.
– En lugar de tampóns, compresas e salva slips, usa a copa menstrual e/ou bragas menstruais e/ou compresas de tea lavables. No caso de usar tampóns, mércaos sen aplicador ou con aplicador de cartón e no caso das compresas ou salva slips, de algodón ecolóxico e con menos plástico.
– Proba cos cueiros reutilizables. Hainos de moitos tipos. Á larga resultan máis económicos.
– Usa discos desmaquillantes lavables como alternativa aos discos de un só uso.
– Considera o emprego de máscaras reutilizables, sempre homologadas.
– Si utilizas esponxa na ducha, elíxea natural e non sintética.
– Escolle xeles e champús en pastilla fronte aos líquidos envasados en plástico. Podes elaboralos tí mesm@. Si prefires as presentacións fluídas, é fácil preparalo na casa a partir do produto sólido. Tamén existe a opción de mercalos a granel.
– Opta por desodorantes en barra elaborados con produtos naturais. Tamén é posible elaboralos un/ha mesm@.
– Inda que son complicadas de entender, mira as etiquetas e decídete por cosméticos con ingredientes máis ecolóxicos e que non conteñan microplásticos, como pode ser o caso de algunhas pastas de dentes e dos exfoliantes. Neste último caso elixe aqueles feitos con pepas ou opta por cepillos exfoliantes ou similares.
– Os bastonciños de plástico son un resíduo moi común nas praias; úsaos con moderación e feitos con materiais biodegradables.
– Utiliza perfume a granel reenchendo o mesmo envase de vidro. Resultan moito máis económicos e tes multitude de aromas a elixir.

LIMPEZA DO FOGAR
En primeiro lugar, non te obsesiones coa desinfección do fogar; moitas veces cun pano seco ou cun pouco de auga é suficiente. Non ten moito sentido, por exemplo, desinfectar un chan que vas pisar coa sola dos zapatos. Mesmo en época de covid non vas conseguir nada desinfectando as superficies que compartes coas persoas que convives e respiras o mesmo aire.
Os produtos de limpeza habituais conteñen substancias tóxicas e moi contaminantes como os fosfatos ou os tensioactivos, que rematan nos sumidoiros e finalmente chegan aos ríos e mares.
– Unha maior cantidade de produto non é sinónimo dunha mellor limpeza senón máis ben ao contrario; un exceso de espuma, deterxentes etc. poden dificultar o lavado e mesmo estropear os electrodomésticos. Cíñete ás cantidades recomendadas.
– Se tes a posibilidade, merca produtos de limpeza a granel con envases reutilizables.
– Evita o uso de ambientadores. É mellor ventilar e, no caso de precisalo, usar plantas aromáticas ou aceites esenciais para aromatizar as estancias.
– Para os residuos domésticos utiliza bolsas recicladas e biodegradables. Reutiliza as que teñas por casa.
– O limón, o ácido acético (vinagre), o bicarbonato sódico, o borato sódico (borax) ou o percarbonato de sodio son potentes limpadores e/ou desodorantes con múltiples usos no fogar. Hai diferentes receitas que os combinan, polo que podes facer na casa o teu propio deterxente de roupa ou louza, quitamanchas, blanqueador, limpador de superficies, produto alternativo ao suavizante de roupa, etc.
– Reduce ou mesmo elimina o uso do suavizante de roupa; son moi contaminantes, acortan a durabilidade da roupa e poden afectar á pel. Substitúeos por bicarbonato para eliminar os malos cheiros ou xabóns con aceites esenciais.
– Os xabóns naturais e neutros son suficientes en multitude de ocasións. Pódelos facer a partir de aceite usado.
Ao longo deste mes publicaremos algunha receita de produtos de hixiene persoal ou limpeza do fogar. Vai gardando os botes valeiros dos teus produtos habituais xa que en canto probes os ecolóxicos, non vas querer mercar outros. E, como sempre, agardamos as túas aportacións.

Publicado por: garza18 | 18/10/2021

RESUMO DA LIMPEZA DE MONTALVO O 16 DE OUTUBRO

Só puidemos recoller durante unha hora pois tivemos que retirarnos antes do esperado debido á choiva. Polo tanto só percorremos unha cuarta parte da lonxitude da mesma, pola súa parte leste.

O volume recollido non foi moito, sen embargo é preocupante a cantidade de anacos pequenos de plástico atopados (entre 10 e 0,5 cm). Este foi con diferenza o tipo de lixo máis atopado, cuns 400 anacos. (Nas fotos adxuntas amósase nunha man o recollido en 2 minutos nalgunhas zonas onde a densidade destes anacos era maior).

Estes anacos acabarán convertíndose en microplásticos, que son inxeridos por peixes e outros organismos, capaces de penetrar nas células e pasar a través das cadeas tróficas ata o ser humano. Os efectos na saúde de ecosistemas e persoas aínda se están estudando, pero xa se relacionan con toxicidades e inducción de enfermedades por bioacumulación.
A continuación detallamos o resto de tipos de lixo máis abundantes atopados:
-Cabichas (colillas): 219.
-Bastonciños dos oídos: 51
-Tapóns: 35
-Anacos de porexpán: 24
-Paus de chupa chups: 17
-Palliñas: 8
-Embalaxes e envases de comida: 7
-Toalliñas: 6
-Botellas de plástico: 4
-Latas: 3
-Bolsas de plástico: 2
-Vasos de plástico: 1
Con respecto aos obxectos de pesca, os máis abundantes foron tarugos de bateas (22), seguidos de 20 anacos de cordas e 4 anacos de redes e 1 nasa rota.
Outros obxectos atopados foron 3 chisqueiros, goma do pelo, peine, envoltorio de compresa, luvas, caixa de tabaco (1 de cada) e 2 restos de xoguetes.


Ademáis da multitude de pequenos anacos dispersos pola area, tamén observamos que nas zonas de rochas, moitos anacos de plástico e porexpán quedan atrapados, (ver fotos); sendo moi difícil a súa retirada, pero sendo sen embargo unha fonte de pequenos anacos a medida que se van desfacendo, principalmente de porexpán.

Como conclusión podemos decir que aínda nos queda moito plástico por reducir nas nosas vidas, e que medidas como a regulación das bolsas, ou a prohibición de palliñas, cubertos e vasos e platos de usar e tirar, parecen estar tendo efecto, posto que se atopan en menor proporción que en anteriores limpezas.

Tamén temos que recordar que existen alternativas aos bastonciños dos oídos de plástico, como os de cartón, e que nin estes nin as toalliñas se deben tirar xamais polo retrete. Con respecto ás bolsas de plástico, é moito máis importante a redución mediante o uso de bolsas de tea reutilizables, que o uso de bolsas compostables, xa que estas tamén acaban no mar. De feito, o 50% das bolsas atopadas hoxe na praia, eran compostables. De maneira que se non se botan no colector axeitado (composteiro), van acabar no mar, onde poden asfixiar animais igual que as outras, ou ben acabarán no colector xenérico e de aí a incinerar en Sogama.

Por último, temos que insistir na necesidade da limpeza manual e non con tractores e cribadoras, posto que estas non son eficaces na recollida dos pequenos anacos, e ademáis retiran algas, (que non son lixo, e son necesarias para o ecosistema). Especialmente importante é non empregar estas máquinas en praias con sistemas dunares, (e así llo fixemos saber aos responsables do concello) como actualmente se fai en praias como Baltar, Areas, Canelas ou Major, posto que rompen o perfil da duna embrionaria, alterando o equilibrio dunar e retirando unha fonte de nutrientes (as algas), importante para as especies que alí viven. E se se trata de praias como Montalvo, onde aniña a especie protexida Píllara das dunas, a limpeza con tractor debería ser eliminada xa definitivamente. Ademáis das ventaxas anteriores, a limpeza manual ten outra adicional, e é que crearía máis postos de traballo que o uso dun tractor.

WhatsApp Image 2021-10-16 at 18.03.17

Publicado por: garza18 | 13/10/2021

O CES PARTICIPA NA LIMPEZA SIMULTÁNEA DE PRAIAS


Este ano unímonos á Limpeza Simultánea de praias organizada por Adega para visibilizar o grande problema do lixo plástico no mar. 

Así poderemos visualizar de primeira man a necesidade da REDUCIÓN na xeración de residuos, principalmente de tipo plástico, temática na que levamos traballando todo este ano a través das propostas mensuais.

Por outra banda, tamén reinvindicamos a necesidade da limpeza manual frente á mecanizada en tódalas praias con sistemas dunares, para non alterar o perfil dunar nin eliminar as algas, que non son lixo, e forman parte do ecosistema praia-duna. Pero especialmente nesta praia de Montalvo, onde este tipo de práctica é fundamental para que os niños da especie protexida píllara das dunas, vaian adiante.

A cita é este sábado 16 de outubro ás 16:30 horas na Praia de Montalvo (Concello de Sanxenxo). Quedamos no aparcadoiro da “sartén”. 

Pregamos ás persoas interesadas en vir que traian o seu propio par de luvas reutilizables (luvas de horta, xardín ou bricolaxe), para evitar a xeración de novos residuos. (Aínda asi, tamén teremos luvas reutilizables por se alguén se esquece). 

Así mesmo, seguimos coa normativa Covid, polo que pregamos a tod@s @s participantes que respecten as restricións vixentes. 

As persoas interesadas en participar poden consultar aquí o protocolo de limpeza ecolóxica de praias: http://adega.gal/media/documentos/Protocolo-Praias-2017.pdf  

 

 

Publicado por: garza18 | 12/10/2021

PROPÓSITO DE OUTUBRO: NON VERTER O ACEITE USADO

 
 
O aceite usado non debe ser vertido polos desaugues, xa que isto provoca:

– Deterioro da fontanería doméstica e redes de saneamento públicas.

– Dificultades na posterior depuración das augas residuais e sobrecustes.

– Limitación da capacidade autodepurativa dos cursos fluviais, ao formar unha capa superficial que impide o intercambio gasoso por parte das especies acuáticas.

Un litro de aceite pode chegar a contaminar o equivalente ao consumo anual doméstico dunha persoa.

Na casa separa o aceite para a súa reciclaxe:

– Introdúceo nunha botella de plástico evitando o seu derrame e lévao ao contenedor de aceite.

– Elimina os restos do recipiente raspando cunha espátula de silicona. Tamén podes limpar os restos cos panos de papel usados que vaias desbotar (logo deben ir á basura xenérica).

Deste xeito o aceite vai poder ser reciclado, coas seguintes posibilidades:

– Industria química: fabricación de carburantes, disolventes e vernices, pinturas, lubricantes, ceras e candeas…

– Industria cosmética: fabricación de xabóns…

– Sector agrogandeiro: compostaxe, fabricación de pensos…

O aceite pódese compostar en pequenas cantidades (non máis do que arrastren os restos de comida) e ben mesturado coa fracción seca.

O aceite de fritir non debe ser reutilizado en exceso porque é moi prexudicial para a saúde.

Publicado por: garza18 | 22/09/2021

LIMPEZA NO RÍO UMIA

O próximo domingo, 26 de setembro, convidámoste a reivindicar a limpeza dos nosos ríos e a gozar do.Umia.

A cita é ás 11.00h da mañá en Pontearnelas, na Ponte dos Padriños.

 

Durante o mes de agosto deste ano se estivo a facer unhas obras de ancheamento do vial costeiro preexistente no lugar dos Leirós, en Vilalonga (Sanxenxo). Ditas obras tiveron como consecuencia a corta de vexetación e vertido de terra ao mar próximo.

O lugar de Os Leirós localízase na Zona de Especial Protección dos Valores Naturais: ”Complexo Ons – O Grove”, nun espazo natural protexido a nivel internacional pertencente á Rede Natura 2000.

Os proxectos realizados en Rede Natura 2000 deben pasar por un proceso de avaliación ambiental e información pública. O CES non ten constancia de dito procedemento.

Esta é unha zona de descanso e alimentación de aves acuáticas de protección internacional. O CES considera importante a ordenación do uso público dunha área natural protexida, xa que o desfrute e coñecemento do medio por parte dos veciños e turistas é crucial para a súa conservación, pero este desfrute non debe impactar naqueles valores naturais que deron pé a súa protección.

Se a intención destas obras é a adecuación dun acceso para peóns (cuestión que descoñecemos) o CES considera que hai alternativas para a práctica de sendeirismo e cicloturismo máis sostibles, empregando a rede de camiños xa existente, como as rutas xa marcadas na zona pola propia Consellería de Medio Ambiente.

O CES solicitou a través de tres escritos ao Servizo provincial de Costas, da Consellería de Medio Ambiente e ao Concello de Sanxenxo que aporten información sobre:
A que proxecto e fin responde dita actuación, así como os seus promotores.
-Que se nos dea información sobre os termos de autorización ou licencia que as 3 entidades deberon
dar para dita obra.
– Se nos dea información do estado de tramitación do proceso de avaliación ambiental e información
pública que dito proxecto debería ter asociado e do que o CES non ten constancia.

Ao marxe desta información, o CES solicitou que dita actuación se corrixa canto antes: se recollan as terras vertidas ao mar e se deixe medrar de novo a vexetación das beiras do camiño para que volva ser un camiño de non máis de 2m de ancho. Que en xeral non se promova o uso de camiños costeiros no espazo Rede Natura 2000 Ons-O Grove que se achegan aos pousadeiros das aves acuáticas e das súas zonas de alimentación.

Tamén solicitamos información sobre as características e estado de tramitación do plan anunciado na prensa en agosto sobre a Rehabilitación do litoral norte do Concello de Sanxenxo, xa que o litoral de Vilalonga acolle grandes valores ambientais que precisan dun coidado especial e que ao estar incluído no espazo natural protexido debe ser alterado o menos posible.

As solicitudes foron entregadas o 8 de setembro e a día de hoxe non foron contestadas por ningunha das
administracións requeridas.

Publicado por: garza18 | 22/08/2021

O CES ALEGA CONTRA O PARQUE EÓLICO DE CASTROVE

O Colectivo Ecoloxista do Salnés considera ao documento de inicio ambiental do Parque eólico de Castrove pouco rigoroso e que non cumpre cos preceptos que indica a lexislación de avaliación de impacto ambiental.

O CES presentou esta semana ante a Consellería de Medio Ambiente un documento coas súas consideracións ante o documento de inicio que presentaron os promotores dun parque eólico no Monte Castrove. Dito documento inicia a tramitación para lograr da Xunta de Galicia o certificado de declaración ambiental, documento indispensable para a instalación do parque eólico. Segundo a lexislación que rexe as avaliacións ambientais, neste documento débense mostrar diferentes alternativas viables do proxecto, ponderalas con criterios ambientais, sociais i económicos e tras esta análise escoller a máis adecuada.
Este documento está a exposición pública para que toda a cidadanía poda aportar información que mellore dita análise.

O CES considera que as alternativas mostradas polos promotores non son viables, xa que na alternativa 1 un dos muíños está a menos de 500m de vivendas, incumprindo a legalidade polo que non é unha alternativa tecnicamente viable, así que non é válida a súa presentación. Outra das alternativa é confusa xa que se di que se modifica a posición de dous muíños da alternativa 1 pero realmente so elimina un muíño. Esta presentación de alternativas tan errónea, a base estructural deste informe, invalida completamente este documento de inicio.

Nueva imagen (2)

Ademais o CES cree que o proxecto de parque eólico debe incluír a súa conexión eléctrica á Rede, é dicir, facer público as características técnicas e o trazado desas liñas de media ou alta tensión que verte a electricidade producida no Parque eólico á rede eléctrica xeral. Un parque eólico sen conexión á rede non é funcional, polo que para valorar o seu impacto real deben contemplarse conxuntamente.

O CES presentou outras consideracións relativas á afectación á hidroloxía do lugar, á fauna á flora, paisaxe e contaminación acústica. A nivel de afeccións socioeconómicas, chámanos a atención que nin se mencione posibles afeccións ao sector tan importante na zona como é o turístico.

No escenario da loita contra o cambio climático existe o obxectivo internacional de evitar o incremento da temperatura global en máis de 1,5ºC. Isto esixe reducións superiores ao 7,6 % anual dos gases de efecto invernadoiro. Para elo, é imprescindible acadar na produción eléctrica un horizonte 100 % renovable coa maior brevidade posible. Mais para que esta transición sexa xusta ambiental e socialmente non podemos volver a reproducir os erros que nos levaron a esta situación, na que un oligopolio de empresas enerxéticas perpetúa os seus beneficios de produción aínda que conleve a degradación ambiental. Ante esta realidade, resulta urxente establecer fórmulas que favorezan os consumos enerxéticos e eléctricos que aporten beneficios á comunidade e penalicen os privativos e acaparadores.
Instalacións de iniciativa municipal, de comunidades enerxéticas ou de cooperativas, cubrirían demandas locais e se perdería pouca enerxía no transporte.

Aquí tes acceso ao noso documento de alegacións: Rev.Doc.Inicio Castrove CES

Older Posts »

Categorías

A %d blogueros les gusta esto: