NA DEFENSA DUN DESENVOLVEMENTO SOSTIBLE E DUNHA MAIOR CALIDADE DE VIDA.
O C.E.S. defende a natureza do Salnés
O Colectivo Ecoloxista do Salnés é unha asociación co seu ámbito de acción máis próximo na comarca do Salnés, mais non esquencemos as problemáticas ambientais de maior ámbito. Somos un colectivo aberto a calquera que teña sensibilidade polo noso entorno.
Para defender a natureza hai que coñecela.
Vivimos nunha terra moi xenerosa e un dos seus mellores regalos é o seu medio natural. Este é o noso principal recurso económico e de garantía da calidade de vida. No C.E.S. somos conscientes de que é preciso dar a coñecer os nosos valores naturais. Este é o primeiro paso para sensibilizar ás persoas na importancia de defendelos.
Outro mundo é posible.
Buscamos outro modelo de desenvolvemento. Por iso estamos por un consumo responsable, polo comercio xusto, pola agricultura respectuosa co medio, pola distribución dos recursos, por unha sociedade de encontro e diálogo, pola cultura da solidariedade e da paz.
Por outro mundo…, porque é posible.
Dende 1988 ata hoxe sen parar.
Xurdimos en abril de 1988 como Asociación Ecoloxista do Grove, e en 1991 ampliamos os nosos horizontes como Colectivo Ecoloxista do Salnés. Dende entón e ata o de agora vimos a realizar:
• Denuncias administrativas e ante a opinión pública sobre as actuacións con repercusións negativas no medio.
• Proxectos e propostas para solucionar problemas ambientais ou para mellorar o entorno de lugares degradados.
• Estudios e recollida de datos sobre flora, fauna, o litoral, etc. do Salnés.
• Actividades mensuais abertas de coñecemento do medio e sensibilización.
• Campañas e charlas divulgativas, informativas e de opinión sobre cuestións medioambientais de actualidade ou con repercusións no Salnés.
• Publicacións.
• Colaboración na recuperación de aves feridas.
Non estamos sós
Pertencemos á Federación Ecoloxista Galega (F.E.G.), que reúne á maior parte dos grupos ecoloxistas de Galicia.
Somos membros da Coordinadora para o Estudio dos Mamíferos Mariños (CEMMA).
Colaboramos con outros colectivos de diversa índole encadrados na vida socio-cultural do Salnés.
Ti podes participar.
Se sufres cando os nosos valores naturais están a ser agredidos, se cres que no Salnés e no mundo otro desenvolvemento é posible … podes integrarte no C. E. S.:
• Podes acudir ás nosas reunións aportando ideas, iniciativas, disponibilidade para traballar…
• Podes informar dos problemas ambientais da túa parroquia ou Concello e tomar cartas no asunto.
• Podes colaborar nas publicacións.
• Podes participar nas actividades divulgativas, campañas, estudios e proxectos.
• Podes aportar a túa cuota de socio sen máis.
• Podes …
CANTOS MÁIS SEXAMOS, MÁIS ACADAREMOS.
Colectivo Ecoloxista do Salnés 
Boas noites, cada vez que baixo do Suído veño horrorizado de ver como acaban coa serra. Non me vou deter en describir a enorme riqueza da serra (bosques, ríos, a gran variedade de rapaces tanto diurnas como nocturnas, a raposa, morcegos e sobre todo recentes estudos no 2005 indican que ten a maior densidade do lobo en Galiza e unha das maiores da Península ibérica).
Case tódolas fins de semana subo dende Covelo e mesmo parece que os muíños de vento procrean eles mesmos dada a rapidez coa que proliferan. Xunto a estes van aparecendo novas pistas de transito para vehículos co conseguinte perigo para moitas especies, sobre todo para os mamíferos como a raposa, xinetas,…e para o rei do monte o lobo. O obxetivo desta mensaxe é pedir que se alguén ten na súa mán a posibilidade de promover algunha acción ben de denuncia, concienciazón o manifestación de protesta pola agresión que está a sufrir o Suído que o teña en conta e que conte comigo. Tamén vale unha orientación porque a nivel particular e sen estar rodado nestes avatares non vexo claro como canalizar o esforzo.
Un saúdo
Miguel
By: miguel on 06/08/2007
at 22:16
SALVEMOS O CASTROVE:
http://meis.blogaliza.org/
By: Meisalnes on 18/11/2007
at 20:43