Difunde esta información!

O sábado 26 de maio ás 11 da mañá quedaremos no paseo da pasarela de Baltar (Portonovo) no seu comezo dende a vila para eliminar Herba da Pampa e Uña de gato.

Estas plantas non son propias da duna, nin tan sequera das nosas latitudes, xa que veñen de Sudamérica e Sudáfrica respectivamente. Chegaron a nós como planta ornamental, mais se naturalizaron perigosamente e en sitios como as dunas compórtanse como invasoras e ameazan ás plantas propias da nosa costa, pois compiten con elas polo espazo, a luz, a auga e os nutrientes.

No 2007 e tras moito traballo e presión do CES ao Servizo de Costas, logramos que rexeneraran parcialmente a duna secundaria de Baltar.

A zona remarcada é o lugar onde se fixo a devandita rexeneración, e onde eliminaremos a Herba da Pampa.

Esta rexeneración avanza lentamente cara o éxito,  pero están a aparecer de novo, (a pesar de que o ano pasado xa traballamos na súa eliminación), pés da Herba da Pampa (Cortaderya selloana)  que poñen en perigo o incipiente ecosistema dunar que se está a formar.
O CES solicitou de novo este ano a Costas que leven a cabo control desta planta, mais non se están a tomar medidas. Por iso, novamente farémolo nós.
Se somos suficientes tamén eliminaremos Uña de Gato (Carpobrotus sp.) que xa leva anos instaurada noutras zonas das devanditas dunas.
Se tés, trae luvas de xardiñería, sacho ou sachiño.
VENTE E AXUDA Á DUNA QUE TANTO ESFORZO NOS CUSTOU QUE REXENERARAN!

Recorda que estas actividades son de balde e abertas a todos os públicos (socios e non socios).

Difunde esta información!

O sábado 12 de maio ás once da mañá quedaremos na ponte dos Padriños en
Pontearnelas – Ribadumia (na estrada vella de Cambados a Pontevedra) para
participar na inspección do río Umia, encadrado no Proxecto Ríos.
Proxecto Ríos é un programa de voluntariado ambiental, no que o CES está
colaborando dende fai anos nun tramo do Umia.

Consiste na creación de distintos grupos que apadriñan un tramo dun determinado río para levar a cabo o seu
estudo e vixiancia ambiental baixo unha metodoloxía común (observación da fauna
fluvial e as concentracións de certos contaminantes).

O único que os participantes deben levar son botas de auga, pois o resto do
material preciso será subministrado polo CES.

ANÍMATE A SABER MÁIS DO NOSO RÍO!

Difunde esta información!

O mércores 25 de abril, celebrouse en Oubiña unha charla – coloquio sobre os efectos e riscos da contaminación electromagnética na saúde, a cargo de Xulio Carmona, membro da Asoc. Pola Defensa da Ría (Pontevedra), grupo incluído na Federación Ecoloxista Galega (ao igual que o CES, organizador do acto), e na Plataforma Estatal Contra a Contaminación Electromagnética.

Na charla sinaláronse os distintos tipos de campos e emisións, facendo un repaso ás publicacións e declaracións científicas sobre o tema, así como aos ditames emitidos pola OMS e a UE, chamando a aplicar o principio de cautela, é dicir, que ante a evidencia estatística e experimental de efectos na saúde por exposición continuada a ditos campos, contemplar unha zonación que permita manter unha distancia suficiente de vivendas e colexios aos focos destas emisións. No caso da subestación eléctrica proxectada para Vilariño, e de acordo con dito principio de cautela, a distancia debera ser de 220 m.

Logo da presentación realizouse un coloquio cos asistentes. Nesta actividade participaron unha trintena de persoas.

A actividade tivo lugar no Centro Cultural Manuel Mariño Castro, dado que o Concello alegou unha suposta coincidencia de actividades para denegar o uso do Centro Cultural de Oubiña.

Difunde esta información!

Difunde esta información!

Este mes o Colectivo Ecoloxista do Salnés vai mirar ao ceo, pero non de calquera xeito. Imos visitar o observatorio astronómico de Cotobade, xestionado pola asociación Sirio. Alí explicarannos algunhas claves esenciais para entender o noso ceo e poderemos ver as estrelas e planetas a través das lentes dun telescopio astronómico do observatorio.

A cita é o sábado 28 de abril. Para aforrar CO2 e cartos de transporte, quedamos ás 20:30h na porta do recinto feiral de Pontevedra (está fronte ao Instituto da Xunqueira, preto da ponte dos tirantes) e alí agruparémonos en menos coches para ir ata Cotobade.

Por motivos de organización da visita, precisamos saber canta xente acudirá, polo que é necesario apuntarse enviando un correo electrónico ao correo CES (cesalnes@yahoo.es) ou unha mensaxe sms ao teléfono 680580086 antes das 14h do 26 de abril.

Haberá que aportar 3€ por persoa para o mantemento do observatorio e das actividades que alí realiza a asociación Sirio.

No observatorio estaremos unhas 2 horas.

É unha actividade aberta a todos os públicos.

Ata pronto!

Difunde esta información!

Neste mes deron comezo as obras do paseo marítimo dos Pasales, nas inmediacións do río da Chanca, en Dena (Meaño). Este proxecto está sufragado pola Dirección General de Sostenibilidad de Costas y el Mar, do Ministerio de Medio Ambiente.

É un tramo máis do proxecto do que se deu en chamar “Senda Verde”, que ten como obxectivo unir Cambados e O Grove a través dun paseo marítimo que vai pola beira da Enseada do Bao. Esta enseada é o corazón do Espazo protexido Umia-O Grove, lugar cuns valores naturais recoñecidos por diversas figuras de protección galegos e internacionais: Lugar de Importancia Comunitaria (LIC), Humedal protexido Ramsar, Zona de Especial Protección para as Aves (ZEPA).

This slideshow requires JavaScript.

Dentro deste paseo englóbase tamén a anunciada construcción dun paseo ao longo da costa  da parroquia de Castrelo, no concello de Cambados, nas inmediacións da desembocadura do Río Umia.

 

Dende o Colectivo Ecoloxista do Salnés (CES) consideramos que o paseo dos Pasales afectará, co paso continuo de xente tan ao borde do mar, ao comportamento das aves acuáticas que paran no noso espazo protexido en busca de alimento e repouso na súa viaxe migratoria.  Recordar que esta zona xa tiña sendas e pistas que nos achegan ao mar en diversos puntos (desembocadura da Chanca, paseo da telleira de Dena, pista dos Pasales…) e que en criterio do CES, uns arranxos puntuais xa terían sido suficiente para, dun modo sostible, compatibilizar a conservación co goce do espazo protexido, servindo ademais de exemplo de austeridade na xestión dos orzamentos públicos, recortados practicamente a cero para as políticas ambientais.

 

Sorprendentemente  a Consellería de Medio Ambiente, Infraestruturas e Ordenación del territorio eximiu esta obra de ter que realizar calquera valoración ou informe de impacto ambiental, a pesares das afeccións negativas ao espazo. Tampouco se abriu á apartación dos veciños pois non pasou ningún proceso de exposición pública.

 

O CES solicitou en varias ocasións o proxecto da senda de Castrelo e non nos foi remitido por ningunha das administracións competentes, o que unido ás actuacións improvisadas que tiveron lugar nos Pasales co tema da extracción de vertidos, todo fai indicar que dito proxecto non existe.

 

Ante a política de feitos consumados, o segredo e as improvisacións no que se realizan estas obras o CES está a estudar as medidas legais pertinentes co obxectivo de rectificar o trazado e salvagardar os valores da Enseada do Bao.

 

 

O Salnés , a 30 de marzo de 2012

Difunde esta información!

O 2 de xaneiro saíu publicado no DOG, para exposición pública, o proxecto de ampliación da Rede Natura 2000 de Galicia, por parte da Consellería de Medio Ambiente, Territorio e Infraestructuras.

O Colectivo Ecoloxista do Salnés, dentro deste proceso público de participación, enviou un escrito a dita consellería, con data do 7 de marzo de 2012, no que se solicita a ampliación do Lugar de Importancia Comunitaria (LIC) Ons- O Grove. Este espazo forma parte da rede Natura 2000, sendo un dos humedais máis importantes da rede galega.

A aportación do CES foi a de solicitar a consideración de ampliar os límites do citado LIC pola costa suroeste da península do Grove. Esta ampliación suporía a protección do sistema praia-duna dos areais de area da Cruz e Paxareiras.

A nosa solicitude basease en tres aspectos:

- Os ecositemas ligados ás dunas grises (as dunas fixas máis alionxadas da praia), están considerados como hábitats prioritarios dentro da Directiva europea que regula a Rede Natura 2000.

- Nesta zona citouse a presencia dunha especie de fungo (o champiñón da duna, Agaricus freirei) cuxa única cita para a Península Ibérica é unicamente no Grove, tendo en area da Cruz a súa principal poboación. Está incluída na proposta do Listado Vermello de fungos ameazados, elaborado polo grupo Micolóxico galego.

- Conservar estes areais contribuiría á protección da dinámica litoral da zona crucial o bo funcionamento dos movementos e sedimentación de area na Lanzada.

Salnés, 8 marzo de 2012
Marta Lois
Presidenta do CES

Difunde esta información!

Como membros da CEMMA que somos, este sábado 17 de marzo pola mañá iremos limpar á foca Nariga, que se está a recuperar no Acuario de O Grove. Apúntaste? Chámanos ao teléfono do CES (680 580 086) para organizarnos.

Difunde esta información!

Celebrarase este sábado 17 de marzo na casa da cultura de Meaño, na parroquia de Simes, a carón do Concello. A primeira convocatoria é ás 19h e segunda ás 19.15h.

Os puntos da orde do día  serán:

DE QUE FALABAMOS TAL DÍA COMO HOXE O ANO PASADO?
Lectura da acta da asemblea ordinaria de 2011.

QUE FIXEMOS AO LONGO DO 2011?
Memoria anual de actividades 2011.

CANTOS SOMOS?
Balance de socios 2010.

COMO ESTAMOS DE CARTOS?
Memoria anual económica 2011.

DAREMOS O RELEVO?
Cobertura de cargos da Xunta Directiva:. presidencia, vicepresidencia, tesourería e 4 vocalías.

QUE CAMIÑOS SEGUIREMOS?
Proxectos de Futuro.

ROGOS E PREGUNTAS

O mesmo día, ás 21.30h, faremos unha cea no Hotel Rústico Eirado do Pino. O prezo é de 15 € por persoa. Para asistir á cea é necesario facer a reserva (ata este xoves) chamando ao teléfono do CES (680 580 086).

Ambas actividades, ao igual que todas aquelas organizadas polo Colectivo, son abertas ao público en xeral (socios ou non socios). Agardámoste!!

Difunde esta información!

Como cada ano por estas datas, o CES acaba de solicitar información sobre o Plan de Labores da empresa Nueva Cerámica Campo ás consellerías de Industria e Medio Rural (agora de novo Medio Ambiente). En dito plan de labores anual, establécense as intencións da empresa con respecto a esta lagoa. E dito plan de labores debe ser autorizado ou non por ambas consellerías.

Dende o ano 2008 a empresa ven reiterando a súa intención de baleirar e reencher parte da lagoa para poder seguir extraendo arxilas no lugar. De feito, nese ano dividiu a lagoa en dúas cun dique de entullos.

This slideshow requires JavaScript.

Ata o ano 2010 incluído, ambas consellerías  fixeron oídos xordos aos nosos escritos onde advertiamos da ilegalidade de autorizar tales obras, por estar dentro dun Humidal Protexido, zona ZEPA, Ramsar e Rede Natura. Ademáis de contar a explotación cunha desfasada Avaliación de Impacto Ambiental do ano 1992, cando a lagoa, xa unha explotación abandoada daquela, non contaba coa alta biodiversidade de flora e fauna coa que conta na actualidade. E ambas consellerías autorizaban a facer tal barbarie, aínda que a empresa non chegou a facelo, supoñemos que porque non lles saía rendible nese intre.

Así que no ano 2010, xunto con outras 6 asociacións, denunciamos esta situación na fiscalía de Pontevedra. O  fiscal respondeu en novembro, cunha resolución na que aínda que non vía indicios de delito (entre outros motivos porque a destrución da lagoa non se chegou a materializar), sí que poñía en entredito a legalidade de ditas autorizacións, e instaba a Medio Rural a que obrigase á empresa a facer unha Avaliación de Impacto Ambiental adaptada á nova lexislación e aos novos valores faunísticos da lagoa protexida.

Por este motivo, no ano 2011, por fin Medio Rural se atreveu a non autorizar a extracción de arxilas na lagoa Fianteira II mentres a empresa Nueva Cerámica Campo non fixese unha Avaliación de Impacto Ambiental, tal como requería o fiscal.

Mentres tanto, a consellería de Industria, que debería terse decantado antes do 30 de abril de 2011, segue sen dicir nada ata hoxe en día.

Así as cousas, non temos máis novas a día de hoxe, por iso o CES acaba de entregar sendos escritos, solicitando o Plan de Labores da empresa no 2012, así como as resolucións de ambas consellerías onde deben decantarse sobre si o autorizan ou non. Ademáis solicitamos información a Conservación da Natureza sobre a Avaliación de Impacto Ambiental, pois nada sabemos dela, se a empresa se dignou facela, nin se será un puro trámite de corta e pega.