Como ven sendo habitual nos últimos catro anos, varios membros do CES se desprazaron hoxe sábado 30 ata Portomarín (Lugo) para participar na concentración pacífica en contra do campionato estatal de caza de raposo que alí se celebraba.

A Concentración estaba convocada pola Plataforma “Matar por matar, non”, que agrupa a varias asociacións ecoloxistas e asociacións de Defensa dos animais. Concentráronse varios centos de persoas, preto da praza principal da vila de Portomarín, ás 13:00. A xornada transcorreu sen incidentes e dun xeito pacífico.

De novo o CES quixemos manifestar o noso rexeitamento a este tipo de competicións cuxa finalidade é cazar o maior número de animais, sen ningún máximo de mortes de raposo establecido.

Calquera xustificación como que a caza serve para regular as poboacións de raposo ou o equilibrio ecolóxico está totalmente falta de fundamento científico, xa que este non é o xeito de facer un control efectivo da especie e os cazadores non deben ser os xestores da biodiversidade galega.

Así mesmo, tampouco se poden xustificar estas competicións como a solución aos problemas do agro galego.

Ademais denunciamos de novo a complicidade das Administracións, pois este ano denegóusenos o permiso para concentrarnos na praza principal en base a unha suposta concentración de gandeiros en defensa do agro e do rural, sen apoio de ningunha organización agraria coñecida. Tratábase dunha estratexia para ternos apartados nunha esquina da vila, entorno a un dispositivo esaxerado da Garda Civil.

Tristemente temos que recuperar o cartel dunha campaña anterior elaborada cunha foto cedida polo lembrado fotógrafo MARLOY do Diario de Pontevedra

Ante o campionato que se celebra o sábado 9 en Meaño, o CES manifesta o seu rexeitamento a esta práctica por considerala incívica, anacrónica e perigosa.
Ademais denuncia o secretismo e falta de información por parte da Consellería de Medio Rural e da Federación Galega de Caza.

O campionato provincial, no que participan sociedades de caza e Territorios Cinexéticamente Ordenados (TECOR) de todo o Salnés, servirá de preliminares aos campionatos galego e estatal. Este último celébrase en Galicia, debido á imposibilidade e aos custes que suporía realizalos en calquera outro lugar de España, onde non se permiten, ou os cazadores terían que aboar taxas moi elevadas.

Os campionatos de caza do raposo estanse a facer baixo a escusa de que hai unha superpoboación, sen apoiarse en estudos científicos serios. Na nosa opinión, gozar matando calquera ser vivo xa é incívico e anacrónico, pero facelo sen saber ata que punto se está a poñer en perigo a supervivencia da especie no futuro, e coa complicidade das administracións, é unha irresponsabilidade grave, e propia de tempos pasados. Ademais, o feito de que se cace nunha superficie tan ampla e humanizada como todo o Salnés, aumenta o tamaño da masacre e o impacto de tan agresiva actividade no contorno natural.

Estes campionatos, que nos últimos anos tiveron grande oposición por parte da cidadanía e dos grupos ecoloxistas, e se anunciaban como importantes acontecementos, agora lévanse no máis absoluto secretismo por parte da Federación Galega de Caza e da propia Consellería de Medio Rural, que non ofrecen ningún tipo de información aos cidadáns.

Esta actitude parécenos irresponsable e irrespectuosa, pois non anunciar este tipo de eventos pode pór en perigo a integridade física da xente que está a pasear polo monte, minguando o seu dereito a desfrutar del de forma respectuosa co medio.

A 8 de xaneiro de 2010

Este é o resultado do traballo do obradoiro de reciclaxe de Nadal.
¿ queredes saber do proceso?

O sábado 19 de decembro achégate a Cambados. No Centro Comarcal do Salnés, no Paseo da Calzada, Raquel e Charo impartirán desde as 11:30 un Obradoiro de Reciclaxe no que a partir dos papeis de regalo que conservamos na casa, aprenderemos a elaborar atractivas felicitacións como as da fotografía do cartel.

O CES ORGANIZA UNHA ANDAINA POLA COSTA DE CON NEGRO

O Colectivo Ecoloxista do Salnés organiza o sábado 31 de Outubro, unha andaina por un tramo da costa da península de O Grove, na parroquia de San Vicente. A ruta terá comezo no aparcadoiro de Con Negro, ás 10 da mañá. Terá unha duración de aproximadamente 3 horas e rematará na zona do Carreiro. Esta andaina é de balde e está aberta a todo o público que queira disfrutar das vistas e que veña cun calzado apropiado para camiñar.

Esta actividade está encadrada dentro da serie “Actividades abertas” que o colectivo leva organizando dende fai 10 anos cunha periodicidade mensual. O obxectivo xeral destas actividades é dar a coñecer aos veciños do Salnés os valores naturais e patrimoniais da nosa comarca, coa finalidade de lograr un maior respeto por eles.

A actividade de mañá ten o obxectivo específico de disfrutar dun dos tramos costeiros cunha paisaxe aínda natural e de alto valor. Neste tramo estase a proxectar, dende a Delegación provincial de Costas e o Concello de O Grove un paseo marítimo, ampliando a pasarela de madeira de Pedras Negras. O CES considera que esta actuación rompería a harmonía desta paisaxe. Nunha comarca coma o Salnés, e concretamente no Grove, é preciso preservar certas zonas da pegada humana, actuando coma zonas onde tanto os veciños coma os turistas poidan contemplar un anaco de natureza case intocado. Temos que recordar que esta zona xa é accesible a través de sendeiros que permiten o paseo de todos aqueles que queiran gozalo, polo que non creemos que unha estructura artificial como é a pasarela sexa nin necesaria nin apropiada para a conservación da paisaxe.

Esta zona, ademais está dentro dos límites do LIC Ons-O Grove, espazo protexido polos seus valores naturais.

O próximo sábado 7 de novembro faremos a inspección de outono do Umia. Vémonos ás 11h na ponte vella en Pontearnelas.
Esta inspección forma parte do Proxecto Ríos ca que o Colectivo Ecoloxista do Salnés colabora na nosa comarca. Anímate a descubrir as diversas formas de vida que habitan nos nosos ríos. A saúde dos nosos ríos é un bo indicador da nosa propia saúde.

O sábado 31 de outubro percorreremos a pé un interesante tramo da costa do Grove na contorna das praias de Con Negro e Castiñeiras, unha fermosa zona que cómpre protexer.
Non esquezas levar roupa e calzado axeitados para camiñar, (mellor botas).
Quedamos ás 10:00 do sábado 31 no aparcadoiro da praia de Con Negro (San Vicente do Grove).

Podes xogar con nós ao 14510. O teu donativo axudará a defender mellor a natureza do Salnés. Se queres algunha participación, chama ao 680 580 086.

O Colectivo Ecoloxista do Salnés leva anos posicionandose en contra da celebración do Campionato do tiro ao pombiño, que un ano máis, estase a celebrar no campo de Tiro de A Toxa. Para o que algúns chaman deporte e diversión, para nós non é mais que unha mostra triste da barbarie que aínda, no século XXI, temos que soportar. Para o CES o sufrimento e morte dun animal (pombas, touros…) por pura diversión, non pode estar lexitimado por unha sociedade que se di evolucionada. Para toda persoa con un mínimo de sensibilidade, este campionato é a nota triste do verán do Salnés, e que non fai máis que retrotraernos a tempos que se din pasados.

Para facer visible a nosa postura, e para facer reflexionar a todo aquel que visite O Grove nestes días, o CES colocou unha pancarta de 5m sobre a C-550, á altura da rotonda de Ardia, onde aparece unha imaxe dun pombiño acompañado do seguinte texto: “É tan divertido matarme? Non á barbarie do tiro ao pombiño.”

Ante a novidade do anunciado uso da munición de cerámica ou acero (mal chamada ecolóxica) o CES recorda á Dirección Xeral de Conservación da Natureza,dependente da Consellería de Medio Rural, que no 2006 esta Dirección lle  abríu expediente sancionador á organización, instando á Hostelera del Noroeste, S.L a recollida dos perdigóns da franxa intermareal e da zona afectada do humedal protexido Umia-O Grove, colindante co campo de tiro. Dita limpeza a día de hoxe non foia cometida, nin tan sequera na franxa costeira, sinxelo e barato de facer. O CES quere recordar que esta situación non é nova, pois a organización deste campionato leva anos incumprindo a lexislación e ignorando as notificacións ao respecto de diversos departamentos públicos. Este incumprimento é por si xa un motivo suficiente para que as autoridades ambientais fagan un seguimento continuado deste campionato e se cercioren de que toda a munición non é de chumbo.

O CES presentou esta semana unha denuncia no xulgado de Cambados contra a empresa Nueva Cerámica Campo, por un suposto delicto contra os recursos naturais e o medio ambiente e contra a protección da fauna.

Os motivos da denuncia remóntanse a xuño de 2008, cando a empresa comezou a construír un dique que dividía en dúas partes á lagoa da Fianteira II, en Vilalonga (Sanxenxo) coa intención de rechear a metade leste da mesma para continuar extraendo arxila.

A lagoa leva máis dunha década sen que nela extraeran arxila e polo tanto foi colonizada por gran cantidade de flora e fauna, sobre todo cobrou interese debido á avifauna que acollía. Esto fixo que a maior parte da lagoa quedara incluída dentro dos límites do Humedal Protexido do Complexo Intermareal Umia- O Grove. Ademais desta figura de protección, de rango autonómico, tamén recaen sobre a lagoa da Fianteira outras figuras europeas e internacionais de protección:

• Zona ZEPA (Zona de Especial protección para as Aves)
• Zona Ramsar, (tratado internacional de protección dos Humedais)
• Zona LIC (Lugar de Interese Comunitario)

Incomprensiblemente os límites desta protección atravesan a lagoa, deixando a esquina oeste da lagoa fora do espazo protexido. Pero aínda así, as obras que se pretenden facer están na metade leste, que sí goza de total protección.

A denuncia posta polo CES ante o xulgado anexa un informe elaborado por expertos ornitólogos que levan anos traballando na zona das lagoas de Vilalonga, no cal destacan os principais valores desta lagoa:

1. Constitúe un refuxio de biodiversidade (máis de 100 especies de aves Polo tanto, a desaparición desta lagoa estaría producindo unha perda importante de hábitats para as especies que en moitos casos se atopan catalogadas como especies ameazadas e vulnerables en diversos convenios e leis estatais sobre a protección de fauna
2. Leva sendo o lugar de mancada ou cambio de plumaxe da especie Anas platyrhynchos (alavanco) durante a última década. Trátase do lugar máis importante de mancada para esta especie de Galicia. Temos constancia de que con anterioridade aos recheos do ano 2003 nesta lagoa, facían a mancada uns 2000 individuos. Despois das molestias e alteración do seu hábitat provocados por dito recheo, o número de individuos que fan o cambio de plumaxe alí diminuíu drasticamente, quedando reducida a uns 500 individuos ata o ano 2008.
   Como o resto de aves, os alavancos fan a muda despois da cría, mudando primeiro os machos e logo as femias e xuvenís. O período de muda do alavanco vai dende finais de xuño ata finais de agosto, dato sustentado en observacións directas durante anos dos ornitólogos que asinan este informe
3. Tamén proporciona lugar de durmida durante o inverno a unhas 500 cercetas, así como garzas reais, garzotas e porróns que pasan o día na marisma de Dena.

A raíz das obras do dique, que paralizou temporalmente o Concello de Sanxenxo por carecer da licencia municipal, o CES, xa en xuño de 2008 enviou un escrito á Consellería de Medio Ambiente e desenvolvemento sostible que incomprensiblemente dera autorización para tales traballos. A Consellería respostou ao escrito, empregando os argumentos da súa autorización, absolutamente faltos de criterio ambiental.  Estos argumentos foron:

• Xustifica a autorización do recheo da lagoa amparándose no Decreto autonómico relativo ás limitacións e prohibicións dentro dos Humidais Protexidos que exceptúa “as explotacións mineiras e extractivas con dereitos outorgados con anterioridade ao 8 de xullo de 2004″. Para o CES, estarse a escudar nun Decreto de rango autonómico para permitir a destrucción dun Humidal protexido pola  lexislación comunitaria e a lexislación estatal. O feito de que non sexa unha actividade prohibida non significa que tal actividade poida destruir un espazo protexido a nivel internacional (RAMSAR), a nivel europeo e estatal (ZEPA, Rede Natura 2000). Ademais no decreto fálase de extracción, non de recheo, como está a suceder.
• Así mesmo ampárase no deber de restauración da lagoa por parte da empresa concesionaria, restauración que tivo que ser feita no seu día, inmediatamente despois da actividade extractiva fai como mínimo unha década, pero que hoxe en día carece de sentido ao estar a zona máis que restaurada naturalmente.
• Por outra banda, a Consellería tamén indica que só autoriza a facer o recheo na época estival (xullo e agosto), para non molestar aos alavancos que fan a mancada (cambio de pluma) ata esas datas. Sen embargo, os ornitólogos que levan anos estudando a zona constatan con total seguridade que a mancada do alavanco prodúcese precisamente dende finais de xuño ata finais de agosto nesta lagoa. Este argumento está totalmente errado e ten consecuencias moi graves, pois autoriza a tales obras impactantes xusto no momento máis delicado para as aves.

O CES, nun segundo escrito á Consellería, ademais de rebaterlle estes argumentos, lles pedía os estudos de fauna e flora e outros documentos relativos ás obras, e  propuña unha solución intermedia, sostendo que a nova actividade extractiva de arxila podería levarse a cabo na zona respectando e conservando a lagoa Fianteira II. A Consellería contestounos cun envío de  planos

pouco relevantes e tampouco actuou en consecuencia. Así, de repetirse as autorizacións do ano pasado, está previsto que empecen de novo as obras a partir do día 1 de xullo.

Ante tal desamparo administrativo e pouco respecto pola lexislación máis básica, o CES decidiu presentar unha denuncia penal no xulgado coa finalidade de conquerir a paralización cautelar das obras, e depurar responsabilidades, así como dicte as medidas oportunas para restaurar o equilibrio ecolóxico perturbado.

No Salnés, a 26  de xuño de 2009.