Tras coñecer os feitos, o Colectivo Ecoloxista do Salnés enviamos un escrito ao Servizo Provincial de Conservación do Patrimonio Natural para que tome as medidas que impidan que este grave dano se siga producindo.
Este é o texto do escrito:
Á ATENCIÓN Do Servizo provincial de pontevedra DE CONSERVACIÓN do Patrimonio Natural. Consellería medio ambiente e ORDENACión do Territorio. Rúa Fernando Ladreda, s/n. 36071. Pontevedra.
ASUNTO: entrada de vehículos nas dunas de praia de Castiñeira (Rede Natura 2000), O Grove.
(…) O Colectivo Ecoloxista do Salnés (CES) EXPÓN que:
- Na zona dunar da praia de Castiñeira, sita na Parroquia de San Vicente do Concello de O Grove, estase a producir a entrada de vehículos rodados (motos e quads principalmente) que fan da area dunar o seu campo de entrenamento e goce (ver anexo fotográfico).
- Que dita praia encádrase dentro dos límites do espazo protexido da Zona de Especial Conservación (ZEC) “Complexo Ons-O Grove”, Rede Natura 2000 co código ES114 0004.
- Que dacordo co artigo 6 da Directiva 92/42/CEE, Directiva Hábitats, os Estados Membros deben adoptar as medidas apropiadas para evitar nestes espazos o deterioro dos hábitats naturais e dos hábitas de especies, así como as accións que repercutan na conservación das especies que motivaran a declaración destas zonas, na medida que estas alteracións poidan ter un efecto apreciable sobre elas. En dita directiva, o seu anexo I onde se citan os Hábitats naturais de interese comunitario cítanse as Dunas Móviles embrionarias (Código 2010) e Duna costeras fijas con vegetación herbácea (dunas grises) (Código 2130), sendo esta última considerada hábitat prioritario para a conservación en dita Norma.
- Que na zona dunar de Castiñeira atópanse os dous hábitats arriba mencionados.
- Que debido á disposición superficial do sistema de raíces das plantas que viven nese hábitat, adaptación para unha maior agarre do chan areoso, o pisoteo ou tráfico sobre estas areas danan gravemente á planta. O paso de vehículos aprasta a vexetación, dana tanto a parte aérea como a subterránea, apelmaza a area e fai socalcos que modifican as microcondicións ecolóxicas do lugar, sendo estas importantes para o asentamento dunhas ou doutras especies no fráxil ecosistema dunar. Ademais estas alteracións do equilibro ecolóxico fan máis probable que a zona se vexa afectada pola entrada de especies ruderais, alóctonas ou invasoras que empobrecen o hábitat e o poñen en perigo.
- Que non se atopa no lugar nin no principal acceso á praia, ningún cartel informativo dos valores naturais deste lugar, nin da normativa asociada ao espazo protexido, entre a que se inclúe o paso rodado e o pisoteo da duna. Tampouco a duna se atopa protexida por barreiras nin existe un sistema de camiños delimitados que ordene o acceso á praia, polo que os usuarios desta pisotean a duna e vanse formando unha rede de sendeiros que interrumpen a necesaria continuidade dos hábitats dunares.
- Que o acceso á praia faise dende o Lugar de San Vicente do Mar por unha pista de terra de acceso a fincas rurais, só asfaltado ata a fonte e lavadoiro do lugar, que este verán parcheouse e no seu tramo final ancheouse ao retranquear muros de fincas colindantes e a desbroces do mato. Isto invita á entrada de vehículos.Tamén ten acceso dende o lugar de Pedras Negras a través dun sendeiro costeiro por onde poden ter acceso quads e motos.
Por todo o anterior, SOLICITO que:
- Se poñan en marcha as medidas pertinentes para unha ordenación de acceso rodado a este tramo de costa prohibindo o tráfico rodado non destinado ó usos agrario polas pistas e sendas de acceso.
- Se valen as dunas ordenando o acceso a pe á praia para os viandantes estudando a apertura de sendas ata o areal.
- Se comunique aos visitantes do lugar da existencia dos valores naturais que o fan merecente da súa protección así como da normativa asociada.
- Que se incremente a vixilancia ambiental da zona.
- Que se comunique ao CES por escrito o máis prontamente posible as intencións, medidas e os prazos de execución (de existir) que a DX de Conservación de Patrimonio natural ten planificado facer para que tales impactos cesen.
Salnés, 12 de setembro de 2018
Colectivo Ecoloxista do Salnés 
Deixar unha resposta