Este é o resultado do traballo do obradoiro de reciclaxe de Nadal.
¿ queredes saber do proceso?

O sábado 19 de decembro achégate a Cambados. No Centro Comarcal do Salnés, no Paseo da Calzada, Raquel e Charo impartirán desde as 11:30 un Obradoiro de Reciclaxe no que a partir dos papeis de regalo que conservamos na casa, aprenderemos a elaborar atractivas felicitacións como as da fotografía do cartel.

O CES ORGANIZA UNHA ANDAINA POLA COSTA DE CON NEGRO

O Colectivo Ecoloxista do Salnés organiza o sábado 31 de Outubro, unha andaina por un tramo da costa da península de O Grove, na parroquia de San Vicente. A ruta terá comezo no aparcadoiro de Con Negro, ás 10 da mañá. Terá unha duración de aproximadamente 3 horas e rematará na zona do Carreiro. Esta andaina é de balde e está aberta a todo o público que queira disfrutar das vistas e que veña cun calzado apropiado para camiñar.

Esta actividade está encadrada dentro da serie “Actividades abertas” que o colectivo leva organizando dende fai 10 anos cunha periodicidade mensual. O obxectivo xeral destas actividades é dar a coñecer aos veciños do Salnés os valores naturais e patrimoniais da nosa comarca, coa finalidade de lograr un maior respeto por eles.

A actividade de mañá ten o obxectivo específico de disfrutar dun dos tramos costeiros cunha paisaxe aínda natural e de alto valor. Neste tramo estase a proxectar, dende a Delegación provincial de Costas e o Concello de O Grove un paseo marítimo, ampliando a pasarela de madeira de Pedras Negras. O CES considera que esta actuación rompería a harmonía desta paisaxe. Nunha comarca coma o Salnés, e concretamente no Grove, é preciso preservar certas zonas da pegada humana, actuando coma zonas onde tanto os veciños coma os turistas poidan contemplar un anaco de natureza case intocado. Temos que recordar que esta zona xa é accesible a través de sendeiros que permiten o paseo de todos aqueles que queiran gozalo, polo que non creemos que unha estructura artificial como é a pasarela sexa nin necesaria nin apropiada para a conservación da paisaxe.

Esta zona, ademais está dentro dos límites do LIC Ons-O Grove, espazo protexido polos seus valores naturais.

O sábado 31 de outubro percorreremos a pé un interesante tramo da costa do Grove na contorna das praias de Con Negro e Castiñeiras, unha fermosa zona que cómpre protexer.
Non esquezas levar roupa e calzado axeitados para camiñar, (mellor botas).
Quedamos ás 10:00 do sábado 31 no aparcadoiro da praia de Con Negro (San Vicente do Grove).

O CES, co fin de dar a coñecer aqueles espazos naturais galegos con grande riqueza paisaxistica e de importancia patrimonial e natural salientable, leva organizando dende fai máis dunha década unha saída anual a un lugar de fora da comarca do Salnés. Este ano o Colectivo Ecoloxista do Salnés organiza unha excursión á serra do Xurés o próximo domingo 28 de xuño.

Unha fronteira que une: parque transfonterizo de Gêres-Xurés

O Parque Natural Baixa Limia-Serra do Xurés ocupa  máis de 20.000 has das partes máis altas dos concellos de Entrimo, Lobios e Muíños. Os seus límites lindan  co Parque Nacional portugués de Peneda-Gerês. Recentenmente a unesco ven de declarar a zona como Reserva da Biosfera.

A visita esta organizada do seguinte xeito:

• Ás 9:00 Saída dende a praza de abastos de Cambados.
• Ás 11:30 Visita á igrexa visigótica de Santa Comba.
• Ás 12:00, en Bande, visita do campamento militar romano de Aquis Querquennis e o seu centro de interpretación.
• Ás 14:00 xantar na área de descanso de Aquis Querquennis.
• Ás 16:00 Ruta a pé polo Parque Natural da Serra do Xurés. A ruta que faremos é a dos miliarios de “A Ponte Nova”, que transcurre por un tramo restaurado da calzada romana XVIII que unía Braga con Astorga.
• Ás 18:00 Fin da ruta na pozas do Riocaldo, onde poderemos darnos un baño nas súas augas morrnas.
• Ás 21:30 chegada a Cambados.

A actividade será guiada por biólogos con experiencia en visitas de grupos por espazos naturais.

Para poder asistir é preciso comprar o billete de bus (que é un folleto informativo da excursión) no teléfono do CES (680580086)

Os prezos  dos billetes son de 10€ para os socios do CES e os nenos menores de 12 anos e de 15 € para os adultos non socios.

O plazo de compra remata o sábado 27 de xuño

É preciso levar un calzado e unha roupa adecuada para andar, así como que cada quen leve a comida e a bebida precisa, xa que a comida. Tamén é recomendable levar uns prismáticos.

Esta actividade é aberta a todos os públicos, coma todas aquelas que organiza o CES.

Os ausentes: Efemerópteras e Planarias

Fixemos a inspección de primavera o domingo de 10 de maio, unhas 10 persoas.
A ausencia de certos invertebrados bioindicadores de nivel 1 (estado bo da auga), (ausencia de Planarias e ausencia de Efemerópteras), que ata o de agora sempre apareceran, preocúpanos. Non sabemos se foi un erro de mostreo ou é que a calidade da auga baixou. Tentaremos determinalo a semán que van cando nos reunamos para analizar os datos.
Salientamos a preocupante presenza das plantas acuáticas invasoras Elodea densa e Azolla filiculoides.
Tamén reiteramos o deterioro do bosque de ribeira.
A planta invasora Elodea densa

Achegamos unha fotografía da actividade aberta do Colectivo Ecoloxista do Salnés, titulada “As aves do Carreirón”.

Xuntámonos arredor de vinte persoas coa fin de observar as aves acuáticas que se deixaran ver no litoral de Punta Carreirón, na Illa de Arousa. Comezamos ás 10:30 e rematamos ao mediodía, disfrutando dunhas horas de sol bordeando toda a península de Carreirón.

Coa axuda de varios prismáticos e 4 telescopios vimos garzas e garzotas, gaivotas patiamarelas, gaivotas choronas, corvo mariño grande e corvo mariño cristado ademais de varias especies de limícolas. Destacou a observación de dous parrulos propios de augas salgadas: un mergo cristado e un parrulo pentumeiro, que non son doados de ver. Ademais unha manda duns 12 arroases pasaron preto de nós.

Tamén recollimos algo de lixo e varias plantas pequenas de Uña de gato (Carpobrotus sp), unha planta invasora que coloniza a zona de duna, desplazando ás plantas propias.

Toda a actividade transcurriu nun ambiente agradable e sen incidentes.

PERCORRIDO ORNITOLÓXICO POLA ILLA DE AROUSA

O sábado 31 de xaneiro ás 10:30 da mañá quedaremos na entrada do espazo natural de Punta Carreirón na Illa de Arousa.

Faremos un percorrido por esta interesante costa observando as aves mariñas na compañía dun ornitólogo, axudados de telescopios e prismáticos.

Se tes telescopio ou prismáticos lévao tamén. E calzado e roupa axeitada. ¡Anímate!

As actividades abertas mensuais son de balde. Non se precisa ser socio.

RUTA POLA LADEIRA DE FEÁNS

Ven camiñar polos montes de Feáns e Siradella e descubrirás unha curiosa e ameazada duna trepadora.

Convidámoste a participar nun percorrido pola ladeira dos montes Feáns e Siradella (O Grove), na que afondaremos nos valores do lugar que corre o risco de ficar sepultado baixo o “green”, incluíndo unha curiosa formación dunar.

A cita é o sábado 13 de decembro, ás 10:30, no miradoiro da Siradella (O Grove).

Ven preparado con calzado e roupa adecuados para o monte.

Duración aproximada: 2 horas e media

Esta actividade é aberta, como xa sabedes, polo que todo aquel que desexe asistir será benvido.

 Novamente recordarvos que para quen queira mercar lotaría de Nadal do CES, estará á venta ao comezo e remate desta actividade.

Actividade aberta de maio

O CES ORGANIZA UNHA XORNADA DE INVESTIGACIÓN DO RÍO UMIA

 O Colectivo Ecoloxista do Salnés organiza a actividade aberta mensual correspondente a este mes: O UMIA NA PRIMAVERA. María Sánchez, educadora ambiental y Raquel González, bióloga e ambas socias do CES, guiarán a actividade, mostrándonos dun xeito práctico a metodoloxía que se segue e os obxectivos que se perseguen dentro do programa PROXECTO RÍOS.

O Proxecto Ríos é unha iniciativa de concienciación, educación e participación cidadá en defensa dos nosos ríos. Fundaméntase na realización de inspeccións do estado dos ríos galegos por parte de persoas ou grupos voluntarios a nivel local, co obxectivo final de facerse responsables da vixilancia (adopción) do río que pasa polo seu municipio ou localidade.

A actividade realizarase o  sábado 10 de maio ás 10 da mañá na ponte vella de Ponte Arnelas (entre Vilanova e Ribadumia) para, dende alí, dirixirnos a unha zona próxima. Inspeccionaremos un tramo duns 500 m do río Umia. Terá unha duración aproximada de dúas horas.

Esta actividade, que xa realizamos en outubro do ano pasado, ten afán de continuar no tempo para poder levar a cabo unha comparativa dos datos e avaliar o estado do río ao paso pola nosa comarca. Así, ao igual que no 2007, comprobaremos a canle, a auga, a flora e a fauna para ir recollendo datos do estado ambiental do río Umia.

É recomendable levar unhas botas de goma para andar pola auga.

Esta actividade é aberta a todos os públicos e é de balde.